Comune di Bordano

FIESTE DI SANT ANTONI

Ai 17 di Zenâr e je la Fieste di Sant Antoni, patron di Bordan. La tradizion e voleve che pe ricorence si fasès fieste cuant che a tornavin i emigrants di Invier. Dopo la Messe, i bancuts a ufrivin golaçs, caramelis e vin brulè. Però il moment plui impuartant e jere la preparazion e la "scjalade" dal pâl de cucagne che al ufrive, al prin che al rivave insom, formadi, salam o chel che si podeve disponi. La tradizion cumò e va indenant in gracie de Parochie che e organize, ducj i agns, la sabide plui dongje de date, une cusine cun golosets locâi, zûcs par grancj e par fruts e, fondamentâl, il pâl de cucagne pe sfide a cui che al rive plui adalt.

FIESTE DI SANT MARTIN

Tarnep al fâs fieste pal so Sant Patron - Sant Martin - ai 11 di Novembar.
Pe ocasion, la domenie plui dongje de date si prontin bancuts enogastronomics te aree dal ambulatori.

FIESTE DI SANT SIMEON

La prime domenie di Setembar, bordanês e tarnebans si cjatin insom la mont pe messe celebrade sul prât denant de gleseute dedicade al Sant.
Cheste tradizion e je rispietade di agnorums e, ancje se cun spirt diferent, e ricuarde la antighe fieste dal ringraziament pai racuelts, cuant che si sierave la stagjon estive.